Гамшгийн аюулын тухай зарлан мэдээллийн дохиогоор ажиллах сургалт, дадлага сургууль зохион байгуулав.
Монгол Улсын Засгийн газрын 2011 оны 339 дүгээр тогтоолоор “Гамшгийн аюулын тухай зарлан мэдээллийн дохио дамжуулах журам”, 340 дүгээр тогтоолоор “Гамшгийн үед нүүлгэн шилжүүлэх журам”-ыг баталж, жил бүрийн 3 дугаар сарын 4 дэх 7 хоногийн Пүрэв гаригийн 16:00 цагаас улс орон даяар гамшгийн аюулын зарлан мэдээлэх дохиогоор ажиллах сургалт, дадлага сургуулийг зохион байгуулж явуулдаг. Тус өдөр Мэдээлэл Шуурхай Удирдлагын Төвийн хэмжээнд гамшгийн аюулын тухай зарлан мэдээллийн дохиогоор ажиллах сургалт, дадлага сургуулийг зохион байгуулж ажилласан байна.
2017 оны 03 дугаар сарын 20-ны өдөр тус төвийн Захиргааны удирдлагын хэлтэс, Техник ашиглалтын хэлтэс, Шуурхай удирдлагын хэлтсүүдийн албан хаагчдыг нийслэлийн Иргэдийг гамшгаас хамгаалах сургалт, арга зүйн төвийн үйл ажиллагаатай танилцуулах, аюулт үзэгдэл, техникийн холбогдолтой томоохон осол, обьёктын болон ой, хээрийн гал түймрийн аюулаас урьдчилан сэргийлэх, аврах, хамгаалах, хойшлуулшгүй ажиллагаа, сэргээн босгох ажиллагааны талаар видео хичээл сургалтыг зохион байгууллаа.
Гамшгаас хамгаалах сургалт арга зүйн төвийн сургалт дадлагын танхимуудыг үзэж, хорт хий утаанаас хамгаалах, эрүүл мэндийн тусламж үйлчилгээ үзүүлэх, гал түймрийн аюулаас сэргийлэх, хамгаалах, өндрөөс аврах ажиллагаа явуулах, газар хөдлөлтийн давтамжийг мэдрэх, өөрийгөө болон өрөөл бусдыг хамгаалах талаар дадлага сургууль хийсэн байна.